Préstanos dar anuncia de les actividaes que’l Conceyu de la Gaita va volver entamar nel Muséu del Pueblu d’Asturies, con motivu del Día Internacional de la Gaita, el prósimu domingu 9 de marzu de 2025, de magar les 10:30 h de la mañana.
El Día Internacional de la Gaita (International Bagpipe Day) ye una iniciativa que dende va dellos años propón la International Bagpipe Organization, con cellebración añal y conferencia internacional bi-añal, como eventu nel que poner la cultura de gaita nel centru, y que dende’l Conceyu de la Gaita queremos apoyar no relativo a la gaita asturiana.
Axuntámosvos equí el cartelu cola programación d’esti añu, que preparamos con tola ilusión de que vos seya d’utilidá y podamos tener un día prestosu en comuña.
L’eventu va cellebrase nel Aula Didáutica del Muséu Internacional de la Gaita (dientru’l Muséu del Pueblu d’Asturies, en Xixón), cola siguiente programación:
- 10:30 h: conferencia «La presencia de la gaita en Cuba«, a cargu de Susana de la Cruz Rodríguez.
- 11:30 h: presentación demostrativa del llibru «El floréu de gaita asturiana» , polos sos autores Balbino Menéndez Suárez y Ricardo Sobeado Hoyos.
- 12:30 h: intervención de la Ilma. Sra. Conseyera de Cultura, Política Llingüística y Turismu del Principáu d’Asturies, Dña. Ana Vanesa Gutiérrez González
- 12:45 h: presentación de gaita en Fa pa neños/es (carauterístiques, recursos pa impresión 3D, etc.), a cargu de Pelayo Fernández Fernández y Alfonso Fernández Álvarez.
- 13:00 h: homenaxe a la gaitera asturiana Keti García González.
La entrada sedrá totalmente LLIBRE hasta completar l’aforu.
A les 14:30 h tendrá llugar una ESPICHA pa socios/es y simpatizantes nel Llagar el Trole (ubicación nel enllaz de baxu, a 10 min en coche dende el Muséu), pa la que sedrá requisitu indispensable apuntase nel formulariu de Google Forms de baxu, y abonar el menú por transferencia bancaria na cuenta de l’asociación (ver detalles debaxu tamién).
Formulariu pa apuntase a la ESPICHA:
- FORMULARIU.
- Fecha límite p’apuntase: vienres, 7 de marzu de 2025.
Precios de la ESPICHA:
- Socios/es: 30€.
- Non socios/es: 36€.
- Neños/es (5 a 9 años): 14 €.
Pagu de la ESPICHA por trasferencia bancaria:
- Cuenta (Caxa Rural d’Asturies): ES80 3059 0020 1336 4351 4122.
- Indicar nel ASUNTU: ESPICHA DIG-2025 y númberu de persones; exemplu: DIG-2025 3 persones.
- Como s’indica nel formulariu d’incripción: ye necesario axuntar el XUSTIFICANT DE LA TRANSFERENCIA BANCARIA nel campu correspondiente del mesmu, o bien, unvialu per corréu lletrónicu a info@conceyudelagaita.com.
El Llagar El Trole ta situáu equí:
El MENÚ previstu y’el siguiente:
- Croquetes de xamón
- Gambes a la «gabardina»
- Mini empanadilles de bonitu
- Tortilles variaes
- Empanaes de hojaldre y bonitu
- Llacón con «cachelos»
- Güevos duros
- Chorizos a la sidra
- Xamón serrano
- Chorizu ibéricu
- Quesos Cabrales, La Peral y tres lleches
- Sidra de tonel
- Vino tinto, agua mineral y refrescos
- Postre: minipastelinos y arroz con llechi
- Café incluyíu
Con cualquier alerxa alimentaria, debe confirmase nel formulariu d’incripción y dexanos saber dalgún detalle nel campu d’observaciones del mesmu, pa poder informar al llagar y facer les previsiones necesaries.
Dende la Xunta Directiva d’esta asociación tamos mui ilusionaos de volver contar con vos nesta xuntaza al rodiu de la nuesa pasión pela gaita asturiana: ¡esperámosvos!
Recibí un candial saludu,
Xunta Direutiva – Asociación «Conceyu de la Gaita».