Alcuentru d’Instrumentos de Caña 2024

I Alcuentru d'Instrumentos de Caña (Conceyu de la Gaita, 2024)
  • Domingu, 9 de xunu de 2024.
  • 12:00 PM.
  • Salón d’Actos de la Casa de la Cultura de Noreña.
  • Entrada llibre hasta completar l’aforu.
  • Organiza: Conceyu de la gaita.
  • Collaboren: Banda Gaites de Noreña, Academia y Banda de Música de Noreña, Ayuntamientu de Noreña.

Seya un músicu estudiante o profesional, oboísta, fagotista o gaiteru, tola so vida musical va xirar alredor d’un elementu común, sicasí menudín, pequeñu, pero d’importancia abondo y de cuidáu imprescindible, ensin el qu’estos intrumentos nun podríen producir el so soníu: ye l’alma de caún d’ellos, trátase de la caña.

La caña apurre al instrumentu toles posibilidaes que puede ufiertar, un material vivu, dacuando, con un comportamientu “misteriosu” qu’anguaño sigue siendo motivu d’estudiu ya investigación.

El Conceyu de la Gaita afalaga’l I Alcuentru d’Instrumentos de Caña a celebrar dende les 12h. del domingu 9 de xunu de 2024 na Casa de Cultura de Noreña, cola collaboración de la Banda Gaites de Noreña, l’Academia y Banda de Música de Noreña y l’Ayuntamientu de Noreña.

Esti primer alcuentru, va centrarse nuna serie de cinco ponencies sobre les característiques del material de la caña -l’Arundo Donax- y el comportamientu y axuste de la mesma nos instrumentos.

Les intervenciones van ser de 15 minutos de duración regulaes por Luis Pola, Doctor en Musicoloxía y representante del Conceyu de la Gaita como miembru de la so Xunta Directiva.

Los ponentes y temátiques van ser les siguientes: Pelayo Fernandez, profesor titular de la Universidá d’Uviéu va falar sobre les característiques del material y la so influencia nel funcionamientu; Miguel Ángel Fernández, Profesor xubiláu d’Acústica y Organoloxía del Conservatoriu Superior de Música del Principáu d’Asturies va tratar sobre’l funcionamientu y comportamientu de les cañes; Juan A. Ferriol y John Falcone, respectivamente primer oboe y primer fagot de la Orquesta Sinfónica del Principáu d’Asturies, van desplicar el funcionamientu y axuste de les cañes nos sos respectivos instrumentos. Chus Solis, gaiteru y fabricante de gaites en Etimta S.L., falará de la caña de la gaita: la payuela.

Esta primer cita, quier ser el pegoyu d’alcuentros futuros sobre’l tema, una iniciativa que la organización espera sía bien acoyida y del interés de tolos músicos de la familia los instrumentos de llingüeta, por ser un llugar de mestura pa toos.

Entraes rellacionaes

Síguenos