SOBRE LOS FICHEROS
Estos ficheros dexen imprimir les pieces necesaries pa completar toles pieces de la gaita, incluyendo:
- Punteru
- Roncón
- Soplete
- Asientos
- Adornos
Los ficheros qu’atópense nesta páxina tán suxetos a la llicencia CC BY-NC-ND 4.0. Permítese la descarga y l’usu personal o educativu, pero nun se permite la so modificación nin l’usu comercial.
Amás, inclúyense tamién los ficheros coles dimensiones del fuelle, amás de les dimensiones de la payuela y el payón. Tamién se suma un ficheru pa imprimir el cuerpu del payón.
El fuelle pue realizase con dalgún material que permita’l so pegáu y que nun dexe pasar l’aire, como escay o dalguna piel de serraxe con capa de xarol. Amás, el fuelle d’esta gaita tamién pue consiguirse al traviés de RosoL Tex.
Nel casu de la funda, los furacos pa los asientos del roncón y el soplete pueden ponese nel centru del pliegu de la funda (o na costura si se fai en dos pieces).
SOBRE LA IMPRESIÓN
Les pieces más esbilles y complicades d’imprimir pola so altura inclúin una anilla pequena de 0,64 mm na so base pa meyorar l’adherencia a la cama d’impresión y la estabilidá. Esta anilla pequena pue quitase fácilmente tres la impresión. Amás, pueden añadise otros elementos tipu «brim».
Les velocidaes d’impresión han ser baxes (< 40 mm/s) pa nun perder precisión nes zones interiores, sobre manera nel casu del punteru. El gorgüelu del punteru ye aproximao a unos 2,8 mm. Lo recomendable ye imprimir toles pieces con un rellenu del 100% y polo menos tres capes nes paredes de la pieza.
El separar les pieces d’adorno ye porque tan pensaes pa imprimise con un material tipu TPU d’otru color. Nel casu d’estes pieces, que son pequenes, recomiéndase imprimiles con una opción tipu «once at a time».
El restu de pieces puen imprimise en conxuntu o bien separase en dos bloques:
- Les pieces llargues: punteru, prima y copa.
- El restu de pieces, nun otru procesu d’impresión.
Toles pieces consumen menos de 500 gramos de material.
El diseñu del punteru foi realizáu baxo’l modelu d’utilidá ES1240639 y col permisu de los autores (Pelayo Fernández y Fonsu Les Regueres). Los ficheros fueron creaos col sofitu del gait@lab, que pertenez al grupu DyMaSt de la Universidá d’Uviéu.
Agradecer por últimu al Conceyu de la Gaita por dexanos asoleyar esti trabayu nel Día Internacional de la Gaita 2025 (9 de marzu), asina mesmu como por aloxar estos ficheros na so web.