PELAYO FERNÁNDEZ FERNÁNDEZ – Profesor titular de la Universidad d’Uviéu.
Nel añu 2006 algamó’l tituláu superior n’Inxeniería Industrial pola Universidá d’Uviéu. Al traviés del so proyeutu de fin de carrera garra contautu cola carauterización esperimental de materiales y la so aplicación a temes d’acústica y vibraciones, dientro la estaya de medios continuos y teoría d’estructures de la mesma universidá, qu’aplicó al estudiu de la vibración de la payuela. Esi mesmu añu algama una beca de formación de personal d’investigación col enfotu d’estudiar y analizar les vibraciones n’estructures al traviés de téuniques d’análisis modal. A lo llargo d’esti tiempu terminó los estudios de doctoráu y fizo visites d’investigación na Universidá de Sheffield (Inglaterra).
Anguaño ye profesor titular na universidá d’Uviéu, onde sigue la investigación nes vibraciones y acústica n’estructures, asina como la caracterización de materiales viscoelásticos ya hiperelásticos, aplicándolo al estudiu acústicu de instrumentos musicales.
Nel so camín musical entama cola gaita asturiana con Jose Ángel Hevía, pasando tamién pola uilleann pipes, el whistle, l’acordión diatónica de la mano de Xuan Nel Expósito y el clarinete. Foi miembru y direutor dellos años de la Banda Gaites Mieres del Camín, cola que graba’l discu El trébole de San Xuan en 1996. Viaxa per España, Bretaña ya Irlanda. Foi subdirector de «La Bandona», formada pol gaiteru Jose Ángel Hevia, y tamién collabora nos discos de la Banda Gaites Villaviciosa-El Gaitero Gaiteros de Maquilan y Badarkablar, nel discu de Xuacu Amieva Al son del fueu y nel de Mariluz Cristóbal Onde la ñublina posa, ente otros. Representa a Asturies delles veces nel Troféu Macallan pa gaiteros solistes nel Festival Intercélticu de Lorient y foi miembru del grupu folk Trebeyu.
Na actualidá ta centráu nes payueles y payones de la gaita qu’él mesmu diseña y constrúi, y asina fai milenta cursos al rodiu de la mecánica y mantenimientu de la gaita nes escueles de música tradicional d’Asturies, como nes de Llangréu, Uviéu o Villaviciosa. Igualmente, participa nes xornaes d’estudiu del Muséu del Pueblu d’Asturies de Xixón, onde collaborao na llaboración de recursos sobre’l mantenimientu y cuidau de la gaita.
Nos últimos años tan desendolcando un trabayu sobre’l diseñu y fabricación por métodos artesanales e impresión 3D de gaites con Alfonso Fernández, “Fonsu les Regueres”, con quién comparte varies publicaciones al respeutu, asina como una patente sobre’l diseñu d’escariaores.